Storia dla grupa

Juebia, 30 Juni 2011 12:40

La ravises di Hosianna và ndëur ai ani '70, canche l fova ruvà te Sëlva l caplan Luis Kranebitter che ova metù man de cumpanië ntan la santa mëssa vel ciantia cun la chitara. Plu tert, ntëur l 1978, ova pona n valgun jëuni dl luech metù man de cianté y suné unitant te dlieja - dantaldut pra la mësses di jëuni – les abelian cun cianties ritmiches acumpaniëdes cun chitara y mo d’autri strumënc.

N possa dì che chësc fova l scumenciamënt dla grupa "Hosianna" che à pona giapà si inuem l ann 1980 metan man cun na atività regulera, n local per fé la proves, strumënc y mplant tecnich. Te Gherdëina fovel mpue l "boom" de chësta sort de mujiga che plajova dantaldut ai jëuni, ma nce chëi plu de tëmp giapova man man che i audiva la bela ujes de ch’la jëunes y la melodies da plajëi y da ritm simpatia a chësta sort de mujiga te dlieja. L caplan sn. Toni Fiung, nstës n ciantarin drët pasciunà, ti stajova do ai "Hosianna", ti dajan truepa pusciblteies de cianté y suné te dlieja. Mutons y mutans fova boni de crië ntan mëssa na bela atmosfera y nce sce jënt plu de tëmp adurvova n fregul per se usé y azeté chësta sort de mujiga moderna te dlieja, ne n’ ie i „Hosianna“ al didancuei nia plu da pensé demez dala vita religëus-culturela de Sëlva.


lingia de conzerc "Legrëza de viver"	la grupa Hosianna ntëur al ann 1994

Mantenian l stil dl cianté acumpanià da strumentisć y seurantulan ti ultims ani pec de mujiga cristiana moderna che vën ciantei ora per l mond, se à la grupa nce giaurì y se à nsci tënì inant al var y ai mudamënc dla mujiga moderna de dlieja. La grupa de mujiga Hosianna à si sënta te Sëlva y abelësc nsci la festes dla pluania plu mpurtantes ntan l ann. Sëuraprò sona la grupa pra s.mësses di jëuni, te dlieja o nce samont, nozes y autra s.mësses al'ucajion a livel de valeda y nce oradecà, sce la vën damandeda.


na s.mëssa cianteda te dlieja de Sëlva (2010)	conzert te Cësa de Cultura "30 ani Hosianna"

Dl ann 2010 d'autonn à la grupa pudù festejé si 30 ani de atività. N à metù a jì na S.mëssa che ie unida cianteda da duc i mëmbri da śën y da ntlëuta y sun la sëira via à mo la grupa da śën prejentà n conzert te Cësa de Cultura. Chëst iede cun pec mpue autramënter de coche n ie scenó usei a audì, mustran nsci nce la gran legrëza y pascion che duta la grupa à per la mujiga.

Avenimënc mpurtanc di Hosianna

27.03.1985 Prim conzert te Sëlva

1987 Prim gran mudamënt pra la grupa

1989 L vën metù su n statut dla lia

1990 Registrazion dla cassëta "Union da Te"

1990 Lingia de cunzerc "Legrëza de viver"

1993 Lingia de cunzerc "Crëidum, speranza, amor" cun registrazion cassëta

1993 Aredamënt dl local nuef per proves sota dlieja

1995 Presentazion dla CD "Die me audes'a" cun 14 cianties scrites nstësc

1996 Conzert a Cambiago (MI) y Stuttgart

1998 Workshop sun la Zanser Alm cun Martin Lindthal

1998 Presentazion dla CD "Freedom is coming"